Тюбинген шкулĕ

Тюбинген шкулĕ (ним. Tübinger Schule) — Тюбингенри турсăмахлăх семинарийĕ çумĕнче Ф. Х. Баур никĕсленĕ экзегетикăри евангели (лютеран) шкулĕ. Çак шкулта Библие тĕпчес ĕçре историри мелсемпе усă курма тытăннă^[1].

Гегелĕн диалектикăллă философийĕ витĕмĕнче пулнă. Çавăнпа Çĕнĕ Халал çине вĕсем «павлинизм» тата «петринизм» хирĕçтăнăлăхĕ (тепĕр майлă, Павăл апостолпа Петĕр апостол шухăшĕсен хирĕçтăнăлăхĕ) пек пăхнă^[2]. Баур пĕрремĕш Çĕнĕ Халала II ĕмĕрте хатĕрленĕ, унти чи малтанхи кĕнекисем Павăл калани тата Апокалипсис пулнă, тенĕ.

Тюбинген шкулĕнчи радикаллă элчи Давид Штраус пулать, Францире унăн идейисене сараканĕ — Эрнест Ренан^[3]. 1840-мĕш çулсенче Тюбинген шкулĕн хăвачĕ ӳссе пынă та 1860-мĕш çулсем патнелле ӳкĕме кайнă^[4].

Хăш чухне малтанхирех XVIII ĕмĕрти Шторр никĕсленĕ, рационализм философиллĕ Ватă Тюбинген шкулне палăртаççĕ.