Чăваш Енри Шупашкар районĕнчи улăп тăприсем

Шупашкар районĕнче çак улăп тăприсем пур:

Толиккасси патĕнчи улăп тăпри. Ку улăп тăпри Иккасси-Кӳкеç çулĕнчен сулахаялла, Иккасси çăвинчен аяларах вырнаçнă. V-мĕш Толикасси пурăну вырăнĕнчен çур çухрăм кăнтăр-хĕвелтухăçнелле вырнаçнă. 1957 çулта ăна чавса пăхнă. Апаш евĕрлĕ савăтсем тупнă.
Шоркка улăп тăпри. Вăл Шоркка ялĕнчен çур çухрăм кăнтăралла, I-мĕш Шоркка пурăну вырăнĕнчен 200 метр хĕвелтухăçнелле вырнаçнă. Кăшт кăна курăнакан виçĕ тĕмĕскерен тăрать. Унта Апаш евĕрлĕ тăмран тунă япаласем тупнă.
Пайтерек улăп тăпри. Ку улăп тăпри уйра, çурçĕр-хĕвелтухăç енчи вăрман хĕрринче вырнаçнă. Алăпа тунă тăм япаласем тупнă. Улăп тăприн кăнтăр енче икĕ пĕчĕкрех тĕмĕске вырнаçнă, ыттисем вара çĕрпе танлашса ларнă.
Платка ялĕ патĕнчи улăп тăпри. Кармал ятлă вырăнта вăрманта вырнаçнă, ялĕнчен пĕр çыхрăм кăнтăр-хĕвеланăçнелле выртать.
Иккасси улăп тăприсем. Иккасси вăрман хуçалăхĕн анăç енче вырнаçнă.
Самуккасси улăп тăпри. Йăршу шывĕн сылтăм çыранĕнче, Самуккассинчен 1 çухрăм кăнтăр-хĕвелтухăçнелле вырнаçнă.
Пикшик патĕнчи улăп тăпри. Пикшикрен 300 метр кăнтăралла, юнашар иртекен çултан сылтăм енче вырнаçнă.
Сарапакасси патĕнчи улăп тăпри. Ялтан пĕр çухрăмра кăнтăр-хĕвелтухăçнелле, Шупашкар-Канаш чукун çулĕнчен сулахаялла вырнаçнă.
Шемшер улăп тăпри. Ялтан 300 метр çурçĕр-хĕвеланăçнелле вырнаçнă. Нумайăшне сухаласа пĕтернĕ, ялăн çурçĕр енчи виçĕ улăп тăпри çеç сыхланса юлнă. Вĕсенче Апаш евĕрлĕ тăмран тунă япаласен ванчăкĕсене тупнă.