Курнавăш ял тăрăхĕ

Курнавăш ял тăрăхĕ — Чăваш Республикин Елчĕк районĕнчи муниципалитет. Тĕп ялĕ - Курнавăш. Тăрăхĕнче çичĕ ял.

Ял тăрăхĕн пуçлăхĕ — Кузьмин Владимир Ильич.

Кун-çулĕ

XVI ĕмĕрĕн пуçламăшĕнче Кĕçĕн Пăла çывăхне Тăвай районне кĕрекен Турикас Тушкил ялĕнчен çынсем куçса килнĕ. Вĕсем Кĕçĕн Пăла юхан шывăн кăнтăр енче йĕркеленнĕ. Хăйсен ялне вара Курнавăш тесе ят панă. Курнавăш «курнă» сăмахран тата «вăш» татăкран тăрать. Ăна пуçарса яраканĕ вăрăм çи-пӳллĕ, хытканрах этем Кăрăç Папай пулнă. Пĕррехинче вăл хăй ялĕнчен кăнтăр еннелле çичĕ çухрăм çула тухать. Ăна çĕр виçекен чарсассăн вара Кăрăç Папай аллисене сарса пăрахса çĕр çине выртать. Унтан çĕр виçекенрен алăсенчен тĕрлĕ енне тата тăватă çухрăм виçсе пама ӳкетлет. Çĕр виçекен Кăрăç Папай ыйтăвне канăçтарать. Уншăн çак чиновника лаша парса тав тăваççĕ. Чи малтанах çак ялта темиçе çемйе çеç тĕрекленнĕ: Кăрăç Папай, Изамблат, Шакл, Мулентей, Туйтерек, Ентирек, Мăрсанай, Мусканей, Явкай, Мишке, Енехмет. Каярах кунта паянхи Курнавăш пулса тăрать.

Паллă çыннисем

• Кадышев Михаил Семёнович — сăвăç;
• Прокопьев Николай Алексеевич — сăвăç;
• Христофоров Иван Иванович— юрăçă;
• Христофоров Вячеслав Васильевич — юрăçă;
• Турхан Кузьма— çыравçă;
• Турхан Хветĕр — сăвăç;
• Турхан Энтри — сăвăç, тăлмач;
• Елен Нарпи — çыравçă;
• Кузнецов Иван Данилович — критик-литературовед.

Ялсем

Ял тăрăхне кĕрекен ялсем:

Ят	Ял капĕ	Халăх шучĕ
Курнавăш	Тĕп ял	1050
Çĕнĕ Пăва	Ял	651
Вырăскасси	Ял	273
Çуткӳль	Ял	275
Аслă Шăхаль	Ял	324
Кĕçĕн Шăхаль)	Ял	194
Турхан	Ял	137

Организацисем

Курнавăш ял тăрăхĕнче çак организацисем пур:

• Курнавăш ял тăрăхĕн администрацийĕ;
• Курнавăшри пĕтĕмĕшле вăтам пĕлӳ паракан шкул;
• «Ылтăн пулă» ача-пăча сачĕ;
• Курнавăшри пĕтĕмĕшле вăтам пĕлӳ паракан шкулăн пĕрле пурăнмалли çурт;
• Курнавăшри пĕтĕмĕшле вăтам пĕлӳ паракан шкулăн стадионĕ;
• Курнавăш ял тăрăхĕнчи АТС;
• Курнавăш ял тăрăхĕнчи моделлĕ библиотека;
• Курнавăш ял тăрăхĕнчи чирккӳ;
• Курнавăш ял тăрăхĕнчи историпе краеведени халăх музейĕ;
• Курнавăш ял тăрăхĕнчи Культура çурчĕ;
• Курнавăш ял тăрăхĕнчи фельдшерпа акушер пункчĕ;
• Курнавăш ял тăрăхĕнчи çыхăну пайĕ;
• 2 мăкаçей.

Çавăн пекех ял-хуçалăх производствăллă кооператив çирĕп аталанса пынине палăртмалла.

Кĕперсем

• Курнавăш ял тăрăхĕн официаллă сайчĕ;
• Çĕнĕ Пăва пĕтĕмĕшле вăтам пĕлӳ паракан шкулăн сайчĕ.